港聞

港聞二

【Emily】支聯推學運短片 人哥翻睇眼紅紅

【明報專訊】六四事件踏入31周年,支聯會推出一系列短片回溯八九學運。噚日首集訪問支聯會主席李卓人,名為《六四之眼》,由人哥憶述當年上京經過以至回望香港嘅社運,人哥重睇當年片段仍然會眼紅紅。

人哥喺片中憶述,當年佢自告奮勇將「民主歌聲獻中華」籌得款項拎上北京,上京後見到工人都希望保護學生;直至6月4日凌晨,人哥本身住喺工人帳篷,軍隊入城後,工人都出去幫忙抵擋,佢其後望住廣場熄燈、死傷者運過飯店,醫院眼前堆滿屍體,「屠城擺在面前」。

人哥又憶述當年被公安扣留,嗰幾日好恐懼,對方不斷教訓佢、形容六四係「反革命動亂」。佢其後喺港人朋友勸喻下簽咗悔過書,加上估計中英政府唔希望變成外交事件,所以返到香港,「返嚟最大影響係,中國民主運動成為我一生承擔」。

明白年輕人感受不同

對於香港年輕人,人哥話明白兩代人感受不同,佢哋一代係苦難中國,人民被打壓人權、經濟被剝削,所以希望中國有改變;新一代見到嘅係財大氣粗、專制、打壓民主、剝奪港人普選權嘅中國,「會話唔係我哋國家,我明嘅」。但佢反問,中共打壓中國人嘅自由,兩地人民有同一敵人,點解唔可以一齊弱化專制政權。

相關字詞﹕支聯會 六四 李卓人

上 / 下一篇新聞