港聞

港聞二

【Emily】霍啟剛阿爺霍英東 最關心孫仔游水未

【明報專訊】港協暨奧委會副會長霍啟剛接受體院主席林大輝嘅節目《大輝主場》訪問時話,家族喺體育嘅淵源,離唔開爺爺霍英東對體育嘅熱愛,佢透露當年爺爺好重視識唔識游水,每次見面第一句都問佢「游咗水未」。佢又話爺爺唔會同佢講人生要點行,但見到爺爺參與體育組織,無形中令佢都認為好有意義。

霍啟剛參與唔少青年工作,佢話當年喺英國讀書,對香港民情社情唔熟悉,當時參與青年工作係希望跳出框框,「一開始無宏大理想」。佢覺得青年交流活動唔應該為做而做,佢早前帶大埔足球會去天津交流,大家共同語言都係踢波、交流亦唔係「洗腦」。至於點樣可以令青年對國家認識更多,霍啟剛建議係咪可以由香港同內地青年,以「中國青年」嘅團隊身分做多啲?

霍啟剛:對郭晶晶一見鍾情

大輝問佢當年點追跳水金牌運動員郭晶晶,霍啟剛就承認對郭晶晶一見鍾情,2004年國家金牌運動員訪港,佢出席晚宴時向對方拎簽名同影相;為咗對方又學拼音。佢話2008年郭晶晶再戰奧運,「我嚇到面都青」,好彩郭晶晶成功衛冕。

相關字詞﹕青年 體育 林大輝 霍啟剛

上 / 下一篇新聞