港聞

港聞二

【Emily】副處長創作 建造業群星獻唱抗疫歌

【明報專訊】政府同建造業界一眾重量級人馬,包括發展局長黃偉綸、建造業議會主席陳家駒、土木工程拓展署長劉俊傑等,日前聯同10個專業團體同商會,合唱抗疫歌《抗疫同舟》,希望鼓勵大家喺艱難時刻互相扶持,一齊「撐」過去。

黃偉綸領唱 兩日完成錄音

歌曲日前推出,領唱嘅黃偉綸噚日喺局長網誌透露,呢首抗疫歌由土木工程拓展署可持續大嶼辦事處副處長(工務)汪志成包辦曲詞,成個過程由拍板、錄音到製作短片,只係用咗兩星期,錄音更只係用咗兩日,汪志成形容係「奇蹟」。

汪志成話疫情下香港面對嚴峻挑戰,希望創作一首勵志歌曲,鼓勵大家發揮互助精神,同心抗疫,於是將之前創作嘅一首歌《薪火傳承》改咗部分歌詞,成為《抗疫同舟》。佢又話土木署長劉俊傑主動聯絡建造業議會執行總監鄭定寕,對方毫不猶豫咁支持同開展錄音工作,所以可以喺咁短時間完成。Emily睇過條片,每人雖然只係唱一兩句,但都好投入,更有唔少業界同工友參與拍攝,見證業界「同一心」。

相關字詞﹕抗疫同舟 發展局長黃偉綸 抗疫歌

上 / 下一篇新聞