港聞

港聞二

【Emily】油尖旺區議員李傲然 率先表態唔選立會

【明報專訊】民主派正協調立法會選舉,唔少素人陸續表態有意參選,原本有意出戰九龍西嘅油尖旺區議員李傲然反其道而行,噚日率先話唔會參加9月嘅立法會選舉,稱為咗成全大局、團結民主派,令泛民可以喺議會過半。

話九西有15張名單 「非常難搞」

李傲然同Emily講,目前九西有15張有意參選名單,形容「非常難搞」,話為免令保皇黨得利,佢決定退出,「我退出可以成全民主派35+嘅目標,係應有之義」。被問到係咪覺得自己唔會贏到初選所以退出,李傲然強調唔係,話自己有勝算,憑知名度同工作,有能力爭到一席,不過為咗團結泛民、成就35+嘅目標,所以退出。

另一方面,前日係選民登記截止日,好多民主派區議員落區最後衝刺呼籲市民登記。民主動力召集人、東區區議員趙家賢落區時,就撞到藝人鄭敬基走過去同佢打氣。趙家賢話:「好窩心呀。」佢又透露,早前喺太古城警民衝突中倒地受傷嘅助理已出院。

相關字詞﹕立法會 民主派 李傲然

上 / 下一篇新聞