港聞

港聞二

【Emily】失業援助金之工工大戰

【明報專訊】疫情下百業蕭條,噚日《城市論壇》討論失業問題,主打勞工議題嘅嘉賓針鋒相對,火藥味濃。工聯會鄧家彪(阿彪)話繼續爭取失業援助金,但畀職工盟主席吳敏兒(Carol)炮轟工聯會無理第二輪抗疫基金漏洞,喺立法會照通過撥款。已經唔係議員嘅阿彪就叫吳敏兒唔好喺節目講議會鬥爭。

吳敏兒轟唔理漏洞 照撐抗疫基金

Carol批評工聯會口話爭取失業援助金,但又同意通過800億、向合資格僱主提供工資補貼嘅抗疫基金撥款,「一味話通過咗先,但明知漏洞大成咁」,問到底要等失業援助金等到幾時。阿彪話節目主要講「保就業」,唔好無端端講議會鬥爭;又強調工聯會一直爭取失業援助金,但如果政府有其他措施,佢哋又因為無失業援助金而反對,「你永遠(反對)成個社會咪攬炒囉」。

阿彪提到上年香港第四季本地生產總值(GDP)因為「人禍黑暴」下跌,又重提又一城商場好多人無工開,唔止因為疫情,仲係因為上年有人入去破壞同燒聖誕樹,搞到商場一度關門。

鄧家彪:永遠反對 成個社會攬炒

Carol就反駁話市民唔敢出去消費係因為警察濫暴,「你鍾唔鍾意警察同你一齊消費行街呀工聯會?」兩人愈講愈遠,主持人蘇敬恆都要即刻先叫其他嘉賓發言。

相關字詞﹕失業援助金 失業 吳敏兒 鄧家彪 新冠肺炎

上 / 下一篇新聞