【明報專訊】最近facebook興起分享舊相嘅「挑戰」，衛生服務界立法會議員李國麟都有響應，同大家分享咗3張舊相。估唔到李國麟20年前留有一頭長髮，相中嘅佢一時紮起馬尾、一時用頭箍等。相片引來唔少人讚好，包括公務員事務局長聶德權、自由黨黨魁鍾國斌等，有網民留言讚李國麟好型、「20年前是護理界長毛」等。唔少人讚佢保養得宜，話佢𠵱家除咗變咗短髮，個樣無乜變。
