【明報專訊】政府前日開記者會公布第二輪抗疫基金，一眾官員入場時，商務及經濟發展局長邱騰華一馬當先「搶閘」行先，快過特首林鄭月娥步入會場，結果出場幾步後隨即「煞停」並轉身，讓林太先行，但佢同勞工及福利局長羅致光，仍然行得先過政務司長張建宗同財政司長陳茂波，呢一幕引起唔少討論。羅致光（CK）噚日喺電台節目上回應話，當時留意到時，已經「有少少喝住」邱騰華，形容邱「嗰剎那一時唔係好醒水，反應太快衝咗出去」，相信佢無心搶閘。
