【Emily】《動物之森》熱爆 政界用嚟「示威」

【明報專訊】Switch遊戲《動物之森》令一眾打機者好沉迷，據Emily所知，唔少區議員、政界中人原來都有玩，香港眾志秘書長黃之鋒係其中一員，佢仲同Emily講要食炒價買，用500幾蚊買呢隻遊戲（原價300幾蚊），之鋒話自己𠵱家都係好初階，努力佈置吓間屋、釣吓魚咁，但唔係太多時間玩。佢話疫情下大家多留喺屋企，所以都會通過《動物之森》交換用戶名、維持社交，亦因為現時搞唔到示威集會，佢哋互相邀請喺遊戲內去對方個島度「示威」喎。