港聞

港聞二

【Emily】民記調查:16%人口罩唔夠一周用

【明報專訊】疫情持續,雖然市面口罩價格稍為回落,但民建聯3月中用電話訪問1369名市民,發現過半人(54%)屋企口罩存貨唔夠一個月,16%甚至唔夠一個星期。民建聯建議政府成立「公私營協作銷售平台」,其中立法會議員陳恒鑌(Ben)建議政府將搜購到嘅口罩,喺派畀工作人員之後如果有剩,可以平啲賣畀市民,令市民唔使周圍撲。

倡政府剩餘口罩平賣益市民

民調問受訪者近期仲有冇去5個人或以上嘅聚會,八成人都好乖,回應「好少去」或「暫時唔會去」,不過仲有18.2%話「成日去」或「間中去」。Ben認為呢一兩成人已經足以令社區爆發,市民防疫意識要再加強。政府防疫工作雖然成日受批評,但民調顯示有56.4%受訪者表示滿意,40.2%表示不滿,Ben相信係因為外國爆疫情,相對而言香港防疫工作較見成效。

五成人滿意政府防疫

疫情亦令人擔心經濟,66.7%受訪者擔心自己或家人會失業。民建聯主席李慧琼要求政府推出第二輪抗疫基金,包埋美容、洗衣等第一輪未資助嘅行業,同時希望政府設失業援助金,強調失業潮、開工不足都會成為「炸彈」,唔可以睇小。

上 / 下一篇新聞