港聞

港聞二

【Emily】「點對得住前線醫護」 斥工務組開會 陳淑莊林鄭上身

【明報專訊】民主派議員早前要求立法會停開所有同疫情無關嘅會議,工務小組委員會主席盧偉國噚日選擇繼續開會,審議港鐵沙中線工程追加嘅86.9億元撥款,但兩個鐘會議完結時都未通過。特首林鄭月娥日前眼濕濕咁問違反檢疫令嘅人「對唔對得住醫護」,泛民噚日就借用嚟問盧偉國同出席會議嘅運房局長陳帆,話呢個時候照開會「對唔對得住醫護」。

民主黨胡志偉批評沙中線追加撥款冇迫切性,即使工務小組通過咗,喺財會都要排隊。公民黨陳淑莊激動咁問:「陳帆局長你點對得住醫護?」佢話醫護叫大家留喺屋企,香港咁耐無爆發係萬幸,如果立法會呢度爆發就好大件事;又問「點解淨係工程界有工開最緊要呀?咁醫護呢?佢哋一路都係服務緊呀」。

陳帆話全城抗疫下有啲項目要持續,若然喺今屆立法會拎唔到撥款,工程會喺今年10月財政乾枯,牽涉2000幾個工人,對香港整個經濟好大影響。佢又話明白要保持社交距離,「大家開會珍惜時間,縮短啲、精簡啲都有幫助」。

盧偉國就回應話工程界唔止對得住醫護,更加係緊密伙伴,例如日以繼夜建設組裝合成嘅檢疫中心,希望議員唔好製造社會分化。

相關字詞﹕民主派 鄭松泰 盧偉國 工務小組

上 / 下一篇新聞