港聞

港聞二

【Emily】反對亂派1萬抗疫 梁繼昌話無助刺激消費

【明報專訊】財政預算案月底出爐,唔少黨派建議全民派錢,以刺激消費或幫補市民買抗疫清潔用品嘅花費,不過亦有立法會議員唔認同。會計界議員梁繼昌(Kenneth)話,唔會主張無目的咁每人派1萬元,佢解釋,如果每個家庭都有足夠嘅糧食、清潔用品,咁派錢先可以刺激消費,但如果現時派1萬,市民只會用嚟買漂白水,屆時糧油、米等必需品物價都會因此上升,無助刺激消費。

莫乃光:只會變畀錢市民撲貴口罩

資訊科技界議員莫乃光(Charles)就話,對盲目派錢有保留,如果冇政策解決市民關心事項,就只會係畀錢市民撲口罩,反問市民係咪要買街邊三四十蚊一個嘅口罩,認為咁無助解決問題,屆時藥房只會繼續加價。

講起口罩,Charles又提到,其實工業界唔少有心人都希望喺本地生產口罩,甚至有人研究緊如何製作口罩生產機器,佢話目前主要係原材料供應上有問題,例如有人唔夠鐵線。佢舉例理大搞緊製作可以重用嘅布口罩,其實唔少人都嘗試緊,不過呼吸就會平時較戴嘅外科手術口罩辛苦。

相關字詞﹕漂白水 清潔 研究 資訊科技 派錢 消費 科技 財政預算案 立法會議員 口罩

上 / 下一篇新聞