港聞

港聞二

【Emily】杜汶澤叫到 「皮褸姐」陳淑莊助派萬口罩

【明報專訊】自由黨黨魁鍾國斌(Felix)同理工大學合作,研發可防菌殺菌、可重用嘅布口罩已投產,正當大家期待中,Felix話遇到阻滯。Felix噚日喺facebook發帖大叫「死火死火」,話幫口罩做驗測認證嘅公司,同座大廈「有人中咗新病毒(新冠肺炎)」,所以全座大廈要封14日,佢慨嘆「個驗測報告要遲多兩星期才有」,但唔會浪費時間,「生產照做,期望報告一出就即時有數萬口罩」。有網民留言話「禍不單行」,但都有人話「好事必多磨」,又叫Felix搵第二間認證公司。

Felix整口罩,其他議員亦努力搵口罩同派口罩。啱啱被藝人杜汶澤稱為「皮褸姐」嘅公民黨立法會議員陳淑莊(Tanya)噚日喺facebook上載一張相,自稱「超齡工廠妹」,相中佢以皮褸造型拆紙箱──原來佢早前收到杜汶澤聯絡,話想捐出1萬個口罩畀有需要嘅人。於是Tanya即刻聯絡工黨議員張超雄,第一時間將千幾個口罩送畀青衣長康邨嘅長者,又去買手套、密實袋,將其餘8000幾個口罩分開入袋,再派畀有需要嘅人。

上 / 下一篇新聞