港聞

港聞二

【Emily】政團年宵賣花 支聯12花語說 12鬥士

【明報專訊】今年政府年宵市場不設乾貨攤位,唔少政團改為賣花,繼續傳達政治信息。支聯會今年設「自由花圃」,賣12種花,用花語帶出12位民運同維權人士嘅精神,例如康乃馨代表「天安門母親」;風信子代表「709大抓捕」中因「顛覆國家政權罪」被判監4年半嘅律師王全璋,反映佢嘅堅定精神。

李卓人對今年籌款唔樂觀

支聯會主席李卓人話往年維園有乾貨賣較熱鬧,擔心今年市民唔買花就唔入維園,相信人流會減少。佢話舊年賣貨、捐款共籌到40萬,對今年再有呢個水平唔樂觀。

守護公義基金亦擺檔賣花,仲賣取名「和勇一家」嘅厚葉植物盆栽等,信託人何秀蘭(Cyd)笑住話佢哋包花雞手鴨腳,又話希望藉年宵同市民見面打氣。Cyd話基金至今籌到1500萬,正處理9宗案件,尚餘1100萬,但DQ案訟費估計達700萬;佔中9人案訟費現時都起碼400萬,只係部分未收到帳單,要預留錢找數。

上 / 下一篇新聞