港聞

港聞二

下一篇
上一篇

【Emily】唔知美心旗下 阿廷去一風堂被攝

【明報專訊】民主黨林卓廷近日都幾黑仔,周日有班人喺元朗遊行屈佢7.21帶人入元朗生事,噚日朝又要去法庭應訊,因為7名民主派議員喺去年立法會處理《逃犯條例》修訂法案時,被指阻礙會議,涉違反特權法。到咗噚日中午,佢去馬鞍山一間餐廳食晏,被發現幫襯美心集團旗下嘅一風堂拉麵,仲將相片放上網批評。

阿廷就話,佢噚日一早上庭,然後趕入馬鞍山,下晝幫區議員黨友開檔寫揮春,時間好趕要醫肚,去到商場見到間餐廳有位,於是急急入去食,無留意食店原來係美心嘅。佢話見到商場有元氣壽司,呢個佢知道背景,但記唔到咁多餐廳名,承認「唔夠嚴謹」、 「下次會小心啲」。

對於有人批評佢係7.21罪魁,阿廷話明眼人都知道佢係被屈,當日元朗先有白衣人聚集及打市民,佢其後入元朗,但社會上仍有少數人死口要話佢帶隊入去搞事,而有人出嚟遊行針對佢,其實都畀咗機會佢再講清楚。

講番噚日寫揮春,佢話唔少人叫佢寫「五大訴求 缺一不可」等口號,亦有人叫佢幫手寫「黑警死全家」等,但佢話新春大吉,無謂去詛咒人喇。

上 / 下一篇新聞