港聞

港聞二

下一篇
上一篇

【Emily】尚欠3人 電子煙委會流會

【明報專訊】立法會再度流會,講緊嘅係《2019吸煙(公眾衛生)(修訂)條例草案》委員會,原定噚日開會,但法案委員會主席郭偉強會後話,會議法定人數係11,但直至夠鐘都只係得8人出席,仲踭3人先夠數開會。佢話向秘書處了解過,部分議員可能因為外出視察而缺席,又話不排除有議員對條例有意見,所以唔出席會議。

郭偉強提到,會議每月一次,對於流會感到十分可惜,因為條例關乎到對電子煙、加熱煙嘅規管,兩者都係社會大眾十分關心嘅健康問題,亦關乎香港未來戒煙、禁煙及減少煙民數字等政策,期望下次開會可以有足夠法定人數。

此外,會議喺上晝10點45分舉行,但4名委員陳志全、郭家麒、朱凱廸及梁耀忠,都因為去年5月《逃犯條例》法案委員會,而被控違反立法會《權力及特權條例》,案件噚日朝早11點喺東區裁判法院提堂;同為委員嘅法律界郭榮鏗前往聲援。而噚日朝早又有一班議員去咗考察西九文化區地盤。

加熱煙關注組一眾用家代表噚日朝早喺立法會外請願,要求撤回全禁加熱煙、電子煙嘅法案。關注組話過去兩年多次去信食衛局,要求就加熱煙事宜交流、會面,但一直被無視,噚日嘅請願行動係首次接觸到食衛局代表,期望能盡快安排正式會面。

上 / 下一篇新聞