港聞

港聞二

下一篇
上一篇

【Emily】網傳工作坊教投訴老師 講者批「好唔恰當」退出

【明報專訊】反修例風暴以來,教師被投訴個案愈來愈多。噚日網上流傳有團體搞咗個「違紀教師投訴工作坊」,聲稱係「專人為大家講說投訴違紀教師嘅一些須知事項,解答疑難」,當日會有自稱家長義工用「投訴違紀Make it EASY!」為題講解,搞「人人皆高手」投訴工作坊。根據介紹,活動另一講者係教育工作人員總工會會長余綺華,不過佢噚日同Emily講,覺得鼓勵人投訴老師好唔恰當,已拒絕任講者。

無報名方法 無網頁

呢個活動名為「違紀教師投訴工作坊」,顧名思義,教大家投訴老師,並由「香港家長及教育工作者聯會」主辦、「守護者聯盟教育陣線」協辦。網上流傳活動資料,但就奇在無報名方法,亦都無官方網頁刊登活動。Emily向講者之一余綺華查詢,佢證實確有活動。佢話,上月收到主辦單位邀請講解教師操守,去到本月初先知活動牌頭係鼓吹投訴老師,覺得唔太好,已即時拒絕主講。本身係工會會長嘅佢話,自己都係老師,平時都為同行做事,一定唔會鼓勵咁投訴老師。

咁之後活動係咪告吹?余綺華話自己無份搞個活動,唔太知詳情。睇番活動喺2月15日舉行,地點教育局九龍塘教育服務中心香港教師中心。

教局:唔會提供場地

不過,教育局就話「香港家長及教育工作者聯會」唔係教師中心嘅會員團體,教育局唔會協辦及提供場地予該會舉辦活動。

上 / 下一篇新聞