港聞

港聞二

下一篇
上一篇

【Emily】素人促民動改革 增參選空間減撞區

【明報專訊】「民主動力」作為協調民主派參選嘅平台,協調未必一定成功,今屆區選亦有部分選區「撞區」,最終喺未能協調下由建制派勝出。部分不獲民主動力推薦嘅素人,噚日就召開記者會批評民主動力,促請佢哋更新協調機制,給予素人、獨立人士參選空間。

黃大仙區議員譚香文、尖沙嘴西落選人簡浩明、北區盛福落選人呂智恆等開記者會,批評民主動力喺部分地區協調出現問題,導致反抗陣營內耗、部分由建制派候選人漁人得利,要求民主動力全盤改革,包括重組執委會成員產生方式、引入更多獨立及素人加入、公開協調機制等。

簡浩明就喺facebook發帖,話好早已接觸民主動力召集人趙家賢,表示有意參選,希望參與協調,等佢可以早日開始地區工作,但不獲理會。佢質疑點解其後由陳嘉朗出戰尖沙嘴西,係咪排斥同路人,又指陳自稱泛民唯一推薦候選人,有誤導選民、不公義情况。

趙家賢就向Emily表示,今次已盡力做好協調工作,例如紅磡灣、馬鞍山市中心等地區都有做初選,已盡最大努力處理撞區;佢承認民主動力受協調機制制約,兩年前曾開會討論小選區初選機制,但有政黨組織有保留,故未能實行改革倡議。佢話清楚知道現時機制未能有效回應急速發展嘅公民社會,需要改革,會稍後做,亦會誠意聆聽多個持份者嘅意見,並呼籲有規模嘅政黨尊重公民社會。

相關字詞﹕參選 區選 泛民 馬鞍山 區議會 建制派 民主派

上 / 下一篇新聞