【明報專訊】由11名素人組成嘅「屯門十兄弟」，喺今屆區議會選舉中取得佳續，贏到9席。佢哋噚日同傳媒茶敘，提及希望未來可以同各個民主派政黨合作，強調今次民主派大勝就係因為大家團結。「屯門十兄弟」又話，支持有經驗嘅泛民區議員擔任區議會主席，帶領大家做好議會工作，而心水人選係民主黨朱順雅。「屯門十兄弟」亦有意派人競逐副主席。
三聖巫堃泰：
會設「屯門種子基金」
好多民主派候任區議員都表明未來會繼續支援「手足（抗爭者）」，被問到會唔會採用民主黨葵青黨團嘅建議，捐出區議會副主席嘅特別津貼支援抗爭者，候任新墟選區區議員張可森話，單純捐人工去養手足並唔係一個長遠支持，反問如果下屆落選，啲手足點算？佢認為推動一個有可持續性嘅「黃色經濟圈」先係最可行辦法。候任三聖選區區議員巫堃泰提到，有唔少手足都好高學歷，話會成立「屯門種子基金」鼓勵同協助大家創業。
「屯門十兄弟」亦強調，選票係選民嘅託付，未來會努力服務街坊，務求令市民喺未來4年、8年甚至係16年嘅換屆選舉中，繼續支持佢哋。