港聞

港聞二

下一篇
上一篇

【Emily】議員倡音樂噴泉旁建連儂牆

【明報專訊】新一屆區議員明年1月上任,17區將會變成由民主派主導,部分獲現屆區議會支持嘅工程項目甚具爭議,唔少區更有意叫停項目,好似5名現任元朗區議員及28名候任區議員聯署,要求路政署擱置審批17億元行人天橋嘅標書。而觀塘區議會支持興建造價5000萬元嘅音樂噴泉,上年亦已經喺財委會闖關成功;喺區選中成功連任嘅民主派潘任惠珍,噚日就建議要喺音樂噴泉附近加建「連儂牆」。

區選後,觀塘即有聲音提出要擱置興建音樂噴泉,有當選人話希望叫停項目,將批出嘅5000萬元為區內長者提供眼科檢查服務;有區議員更表明如政府唔叫停項目,日後無咩空間同政府合作。不過,潘任惠珍喺facebook話,由於音樂噴泉工程已經展開,要突然煞停會造成浪費,重新立項隨時三五年都未必成事;佢建議修改計劃,喺噴泉附近加建一幅永久「連儂牆」,供市民自由發表意見,仲建議音樂噴泉播放嘅音樂,應該收集民間創作,如《願榮光歸香港》就應該成為「主題音樂」。

煞停浪費 倡《願榮光》成主題曲潘任惠珍:立碑紀念警惕

潘太又建議,可以喺音樂噴泉嘅公園內提供一個自由發表意見嘅「角落」,類似英國海德公園做法;甚至可為項目建立石碑,客觀記錄呢個音樂噴泉嘅故事,「以作紀念及警惕作用」。

相關字詞﹕區議會選舉2019 願榮光歸香港 連儂牆 反修例風暴

上 / 下一篇新聞