港聞

港聞二

下一篇
上一篇

【Emily】平衡交租助理人工 林浩波新煩惱

【明報專訊】區選結束,勝算者開始籌組班底同辦事處,但唔少人面對搵地方開辦事處嘅難題,特別係私樓區,或要捱貴租。香港眾志秘書長黃之鋒話拍檔兼候任海怡西區議員林浩波(Kelvin)就面對呢個問題,之鋒話資源有限,要諗點樣搵到一個唔太細嘅地方,但又可以畀到合理人工請全職議助,唔會剝削手足。

私樓區要捱貴租

對於到會唔會做林浩波嘅議員助理,現為區諾軒議助嘅之鋒同Emily講,區諾軒早前就香港眾志成員周庭選舉呈請勝訴提出上訴,今個月17號法庭就會決定係咪批出上訴許可,如果無上訴許可,屆時區軒嘅議席會出缺,所有議員助理再度集體失業。之鋒話做唔做議助,好大程度取決於資源調配,目前未定案,要睇17號嘅結果。

之鋒話區議員通常扣除水電煤影印文宣雜費,津貼每月餘下大概4萬元,可以用嚟請職員同租舖開辦事處。但點平衡辦事處租金、舖位大細、議員助理數目同人工,係一大挑戰。之鋒話,綜合街坊情報,新民黨4年後定必喺海怡捲土重來,所以一定要提升民主派嘅地區服務質素,「守住從葉劉(淑儀)手上贏番嚟嘅陣地」。佢呼籲大家如果有計,可以同佢講聲。

上 / 下一篇新聞