港聞

港聞二

下一篇
上一篇

【Emily】梁凱晴:高攀唔起「綾瀨遙」

【明報專訊】唔少素人喺區議會選舉勝出,個別勝選者因外形亮眼成焦點,喺觀塘月華當選嘅梁凱晴仲紅到去日本,獲封「香港綾瀨遙」。噚日佢出席港台《城市論壇》後被問到呢件事,就尷尬咁笑住話「高攀唔起」呢個稱呼,形容自己係好普通嘅女仔,相信可能因為從政嘅女性較少,一旦有女性從政會令人「耳目一新」、引起較大迴響,但都希望大家注意番佢哋嘅區務工作。

希望大家注意番佢嘅工作

本身從事會計工作嘅梁凱晴話仲爭一年經驗、明年6月考埋試,順利嘅話就可以拎到會計師資格,希望有專業知識服務街坊,所以都掙扎辭唔辭職做全職區議員,要視乎未來一年可唔可以兼顧兩邊。

佢承認自己係以政治票為主,要以民主派2003年區選大勝後,被選民認為忽視民生嘅慘敗經驗做警惕,下屆一旦投票率下跌,佢哋亦好大可能落馬,所以會用心經營、深耕區務。

另一政界小花、參曾選港姐嘅新民黨劉聖雪喺區選落敗,被問到會唔會轉區,佢話自己喺當區(東區康山)長大,亦服務咗3年,所以首選都係留喺康山服務。佢形容區選結果係「贏政治、輸民生」,話好多候選人都係打政治牌、抹殺扎根地區多年嘅議員,但相信新民黨一時三刻唔會有退黨潮,形容佢哋喺議會外都有監察角色。

上 / 下一篇新聞