港聞

港聞二

下一篇
上一篇

【Emily】候任區議員被指吸毒 誠邀驗髮

【明報專訊】區議會選舉後,網上出現唔少針對當選人嘅謠言,喺北區清河當選嘅註冊社工袁浩倫(海袁),就被謠傳係隱君子。曾任職戒毒社工嘅海袁面對抹黑都相當大方,話要知一個人有冇吸毒,可以拎頭髮去驗,誠邀造謠者搵佢驗頭髮。

海袁噚日喺fb澄清,話網上話佢吸毒嘅相,係當日佢喺點票站監票時被拍,其後造謠者話佢係「道友」等等,認為唔可以放任搬弄是非。海袁提到,可以透過頭髮驗一個人有冇吸毒、邊個時段吸過毒,自言頭髮成年冇剪過,誠邀造謠者同佢一齊拎頭髮去驗,「如果呈陽性反應,我就畀番驗頭髮啲錢,再加公開承認;如果陰性反應,就你畀驗頭髮錢,再加我告你誹謗同向你追討詆譭我嘅賠償。」。

做過3年戒毒社工

海袁話做過3年戒毒社工,「嗰3年每日放工都從戒毒中心走出來」,佢強調吸毒唔代表係壞人,只喺依賴毒品去麻醉自己,又話認識嘅吸毒者九成都係好人,部分只係講嘢較大聲,希望大家有機會可以了解吓佢哋嘅內心世界。

上 / 下一篇新聞