港聞

港聞二

下一篇
上一篇

【Emily】贏梁福元父子 素人冀區會設7‧21調查組

【明報專訊】區議會選舉民主派大獲全勝,本身民主派只得5席嘅元朗區,其議席亦大增至33席,奪得過半優勢。作為7.21無差別襲擊事件嘅事發現場,喺十八鄉西擊敗鄉事派梁福元嘅司徒博文,以及喺十八鄉中擊敗梁福元兒子梁明堅嘅方浩軒,噚日就話調查7.21事件係首要區議會工作,希望可以喺區議會設7.21調查工作小組。

司徒博文噚日喺商台節目時話,最初認為對手梁福元係鄉事派重量級人物,研判當選機會微,參選旨在令選民有得揀。方浩軒就話本身家住當區,區內有好多新屋苑,認為唔應該只得鄉事聲音。方浩軒提到,要有安心嘅社區先可以講其他建設,形容有啲村民好無辜,即使事件發生喺佢哋村落附近,但唔代表係佢哋問題,所以希望還原真相、令大家安心,無辜村民亦唔好再被標籤。

喺十八鄉東當選嘅李俊威亦話,村內有居民唔知發生咩事,就被人話係「鄉黑」,形容對佢哋唔公道,所以7.21事件需要追究、釐清責任。

翻查資料,元朗區議會曾經於9月討論7.21事件,當時已經有議員要求成立獨立調查委員會,但因元朗區議會只得5席民主派,有關動議結果遭過半數區議員反對。

上 / 下一篇新聞