港聞

港聞二

上一篇

【Emily】指區選問題多 Ann姐搞申訴會

【明報專訊】民建聯立法會議員蔣麗芸(Ann姐)繼「Ann姐聆聽會」同後生仔傾吓偈之後,又有新搞作。Ann姐話市民認為今次區議會選舉不公嘅聲明此起彼落,有見及此,佢打算聽日舉辦「投票問題申訴會」,邀請市民參加,分享對今次區選嘅睇法。

Ann姐提及幾個認為選舉不公嘅例子,包括喺投票前,建制派嘅辦事處接連被縱火同破壞,候選人擺街站時亦接連遭惡意滋擾,支持者表明唔敢去投票;喺投票日出現「和你排」情况,搞到票站大排長龍,影響長者投票意欲;點票時,有候選人投訴點票站企滿反對派支持者,建制支持者無法入內觀看,亦有出現複檢廢票後,建制候選人反勝情况,事後引起大量質疑。Ann姐話聽日下晝喺立法會大樓搞聆聽會,仲話會請官員出席回應大家。大家如果有興趣參加,可以上Ann姐facebook睇吓。如果參加人數太多,就抽籤決定。

另一方面,民建聯主席李慧琼(Starry)話,黨內議員謝票時收到唔少市民投訴,話區選唔公平,要求跟進。Starry話,選舉開始以來,建制派候選人嘅街站同宣傳品因為示威行動唔可以順利擺設,已經將部分個案提交政制及內地事務局同律師跟進。

相關字詞﹕區議會 蔣麗芸

上 / 下一篇新聞