港聞

港聞二

下一篇
上一篇

【Emily】卸任主席 梁智仁寄語接任者多聆聽前線

【明報專訊】現年77歲嘅醫院管理局主席梁智仁將於11月底卸任,由中信泰富前董事總經理范鴻齡接任。梁智仁喺前線服務公營醫療38年,做過公開大學校長逾10年,回顧出任醫管局主席嘅6年,佢形容經歷咗唔少「風風雨雨」,寄語新主席要聽多啲前線及行政人員意見。佢話工作咗54年,係時候退休,否則太太會有微言話「3次都退唔到休」。

服務公營醫療38年

梁智仁1965年畢業於香港大學醫學院,喺瑪麗醫院同港大工作38年,其後擔任公開大學校長10年零4個月,月底完成醫管局主席共6年嘅任期。佢噚日出席傳媒茶敘,話過去6年經歷唔少風雨,包括因應政府檢討醫管局嘅報告,提出124項改善措施。佢又話公營醫療面對人口老化,挑戰愈來愈大,為應對流感季節服務高峰,醫管局已經喺6月制訂應對措施。

佢形容近期社會「有啲問題」,對醫管局有影響,例如急症室同住院病人多咗,交通堵塞都導致同事返工遲到等。對於新主席,佢期望新主席如果有新諗法,可以先聽取行政人員同前線醫護嘅意見。

梁智仁退休後想去倫敦短住兩個月左右,「喺香港無嘢(工作)做真係會無嘢做」,話喺倫敦無乜人識佢,可以周圍散吓步。

相關字詞﹕醫管局 梁智仁

上 / 下一篇新聞