港聞

港聞二

下一篇
上一篇

【Emily】田北辰不點名斥光頭警長造謠分化

【明報專訊】綽號「光頭警長」嘅警署警長劉澤基,喺反修例風波中成為內地「網紅」,開設微博戶口後多次點評時政,日前佢又發帖講嘢,仲誤以為區選有160萬「廢票」,搞到政府要澄清。立法會議員田北辰似乎都幾不滿,噚日立法會對公務員事務局長羅智光作口頭質詢時,佢不點名指有公務員批評政府官員、「增加兩地矛盾」,仲問羅智光「你點忍呀?」

問羅智光「你點忍?」

話說立法會噚日就公務員宣誓事宜作口頭質詢,田北辰不點名指有公務員公開喺內地微博批評政府官員、增加兩地矛盾,以及造謠話選舉有一半廢票、導致政府要澄清,甚至喺帖文話「林鄭我無法繼續支持她(Emily翻查,此話應是微博網民留言)」。田北辰對此似乎相當不滿,強調林太係「佢(劉澤基)大老闆嚟㗎」,質疑羅智光知唔知呢件事,「呢個case,你點忍呀?」羅智光回應時就話,如果有任何行為懷疑違紀、違規,會由有關部門嘅管理當局跟進,又話不評論個別紀律事件,強調有機制、程序處理。

劉澤基近期論政言論相當惹火,如日前喺微博質疑區選有160萬票唔知去咗邊、話有57%廢票,政府其後急急澄清,叫大家唔好亂製造謠言。

相關字詞﹕劉澤基 光頭警長 謠言 公務員事務局 微博 網紅 特首 公務員 立法會議員

上 / 下一篇新聞