港聞

港聞二

下一篇
上一篇

【Emily】泛民老將出征「白區」紛報捷

【明報專訊】今屆區選最大特色係每區都有競爭,民主派多名「老將」出征,喺多個「白區」當選。當中年屆70歲、一直喺反修例運動協助被捕者嘅民主黨黃國桐律師,今屆就離開過往出戰嘅黃大仙彩雲東選區,空降九龍城太子選區,擊敗西九新動力丁健華當選。

曾任6屆區議員、近年淡出政壇前線嘅廖成利,今屆出山空降彩雲東選區,挑戰上屆戰勝黃國桐嘅民建聯蔡子健,結果亦贏咗,令民主派拎番彩雲東選區。民主黨元老級人馬、曾任葵青區議會主席嘅單仲偕,今屆出山參選葵青華麗選區,呢區有5人競逐,主要對手正係民主黨前成員、現為經民聯嘅黃耀聰,最終單仲偕以3469票贏埋。

至於離島東涌北呢個「白區」,民主黨今屆派出過往只參戰葵青大白田選區、但上屆落選嘅徐生雄(圖)出馬,該區今屆有3人選,包括民建聯葉培基同實政圓桌潘俊恩,最終徐生雄以1332票當選。徐生雄同Emily講開,當初空降東涌北的確無好大信心當選,但希望所有「白區」都有人挑戰,於是佢就去做,承認選戰期間常被對手批評無喺呢區做過嘢;但佢話反修例運動令到好多支持民主嘅市民投票畀佢,最後亦不負眾望當選。

上 / 下一篇新聞