港聞

港聞二

下一篇
上一篇

【Emily】祝賀「何已完」 街坊開香檳

【明報專訊】民主派喺區議會選舉擊敗建制派,奪得17個區議會控制權。曾聲言唔會被嚇怕、唔會屈服嘅立法會議員何君堯連任區會失敗,被戲稱為「何已完」,前晚無現身票站嘅佢,率先喺網上承認敗選,隨即有大批市民喺街上開香檳慶祝,歡呼聲傳遍鄰近屋苑。

何君堯:將佢哋變祥和

何君堯競逐連任屯門樂翠選區,以超過1200票之差被民主黨盧俊宇擊敗。佢前晚無現身投票站,但就喺公布投票結果之前,喺facebook宣布自己敗選,形容投票結果「翻天覆地」同「異常」。旋即有大批網民留言,例如「我真係恭喜你呀」、「好感動,真係天有眼」,又揶揄佢嘅區議員生涯已完結,稱呼佢為「何已完」。

票站公布投票結果後,大批人聚集歡呼,有人開香檳慶祝;歡呼聲劃破深夜嘅寧靜,居於美樂花園嘅住戶都聽到。何君堯後來更新fb帖文,話非常感動反對派排山倒海恭喜佢,能夠將佢哋嘅暴戾變為祥和,都唔係壞事。

噚日網傳有餐廳以42元優惠價提供「何已完飯」,送熱飲或凍飲,不過食客要「手執一葉」先可以用優惠。Emily打去光榮冰室求證,職員話係老闆諗出嚟嘅優惠,「何已完飯」係餐肉、火腿之類嘅碟頭飯,原價56元,𠵱家有七五折優惠。

噚日中午亦有過百人喺中環畢打街聚集同開香檳,慶祝民主派大勝,其間喺區選全軍覆沒嘅新民黨,主席葉劉淑儀出現,即被包圍喝倒彩,有人做拇指向下手勢,最後佢要由防暴警察護送搭的士離開。葉太後來解釋,話自己牙痛要去中環睇牙醫,點知遇到大批「和理Lunch」參加者。

相關字詞﹕葉劉淑儀 何君堯

上 / 下一篇新聞