港聞

港聞二

上一篇

【Emily】28黨友參選 葉劉先幫陳祖光拉票

【明報專訊】建制派選舉協調一向比較好,不過今屆喺觀塘雙順選區,就出現爭取連任嘅符碧珍同香港警察員佐級協會前主席陳祖光相爭。喺兩個建制派之中,新民黨主席葉劉淑儀選擇撐陳祖光,噚日親自落區拉票。

新民黨有28人出戰區選,不過葉太噚日就選擇先去支持陳祖光。葉太喺facebook話,噚日朝早去完山頂選區票站投票後,就馬不停蹄去各區為參選嘅黨友同好友拉票,第一站就到順利邨支持好友陳祖光。葉太話該區選情非常激烈,佢亦為陳祖光同一眾義工打氣,呼籲警務人員同家屬「一定要撐自己人!」

嗰區係三人混戰,除陳祖光同符碧珍,仲有民協嘅梁漢祺。陳祖光之前同Emily同事講有人質疑佢𠝹票,但佢認為民主發展係有能者居之,佢自4月退休已落區服務,若有人用𠝹票論令佢唔選,佢唔會服。

上 / 下一篇新聞