港聞

港聞二

下一篇
上一篇

【Emily】派米派福袋 非牟利機構惹賄選疑雲

【明報專訊】市民對選舉中嘅「掌心雷」、派福袋同義載投票好敏感,擔心係咪有人賄選。噚日就有至少兩宗派福袋誤會,中午有美孚街坊見到有機構喺美孚派大量福袋,懷疑同選舉有關。Emily立即去美孚求證,發現係誤會一場。原來係有一個叫「家盟」嘅精神病康復者家屬自助組織,咁啱喺美孚一間酒樓舉行周年大會同聚餐,同選舉無關。

Emily噚日見唔少叔叔嬸嬸拎住個福袋喺酒樓行出嚟,就問吓佢哋點解咁開心有福袋拎,叔叔嬸嬸同Emily講係嚟參加周年聚餐,同選舉無關,仲話根本唔係當區居民。有嬸嬸畀周年大會嘅議程Emily睇,證實誤會一場。

另有網民圖文並茂話長沙灣Bar Pacific趁投票日派米、涉嫌賄選。Bar Pacific傍晚發聲明,話派米同區選無關,每年11月都會同唔同慈善機構搞派米活動,至今已16年,今年就同香港社區組織協會合作。Bar Pacific強調活動係為關心社區、為有需要嘅人提供免費白米,每個攞米嘅人都要一早申請,活動同選舉無關,「本公司並無進行或參與任何賄選活動,我們百分百支持公平、公正、廉潔之選舉」。

上 / 下一篇新聞