港聞

港聞二

下一篇
上一篇

【Emily】真明星出沒注意 王詩撐黃絲 德嫻去拉票

【明報專訊】今屆區議會選舉投票率同投票人數創歷屆新高,噚日有唔少藝人都落區為候選人拉票。其中王喜噚日朝早到所屬嘅何文田自由道選區投完票後就換上西裝,先後去沙田第一城、美孚、牛頭角、西營盤、荃灣麗城等港九新界多個選區,為一批政治素人拉票,唔少街坊同候選人見到王喜嚟拉票都好興奮。

王喜去美孚牛頭角西營盤荃灣多區

王喜話要選一個合適嘅人入議會,從來唔係「其他人嘅責任」,而係屬於自己嘅判斷,呼籲市民積極投票;又話只要候選人符合「講香港人話、聽香港人話」兩項條件,佢都會無條件幫手拉票,「如果佢唔係『講香港人話』嘅話,你點同佢溝通呢?」唔少街坊聽到之後都拍手叫好。

何韻詩第一次拉票獻袁嘉蔚

何韻詩噚日晏晝亦先後去咗南區、中西區幫民主派候選人助選,其中佢最先去田灣區為袁嘉蔚拉票,仲話「我未做過拉票嘅工作,第一次(拉票)就送咗畀佢(袁嘉蔚)」。之後佢亦去香港仔選區為黃銳熺拉票,同場遇上葉德嫻(Deanie姐)、王宗堯。

Deanie姐話已經去咗海怡、鯉景灣、炮台山拉票,兩人呼籲大家一定要去投票。入夜後何韻詩則去海怡西選區,同香港眾志秘書長黃之鋒一齊為林浩波拉票。

40幾香港藝人拍片叫「止亂制暴」

另一方面,官媒《人民日報》前日就喺微博發布一段名為《香港加油》嘅影片,有40幾個香港藝人現身,以廣東話呼籲「重建我們認識的香港」同「止亂制暴」等,參與嘅包括成龍、陳小春、惠英紅、王祖藍同埋容祖兒等。

上 / 下一篇新聞