港聞

港聞二

下一篇
上一篇

【Emily】話可憐理大留守者要食包 警曲線炒熱生命麵包情懷

【明報專訊】圍堵理大嘅警察採取「廣播」策略,除咗播《十面埋伏》呢啲歌,「眾新聞」前晚拍攝到警察嗌咪,話留守者要食冰冰冷冷嘅生命麵包,覺得佢哋好可憐,警察放工就會上深圳食海底撈。呢段聲帶喺網上擊起千重浪,有網民好妙咁回應:「(警察)返工吸二噁英……我都覺得佢哋好可憐。」

個警察一開始講話「我真係覺得你哋好垃圾,做又做唔掂、做又做唔好。我睇你哋唔起呀,唔係因為我同你政見、立場唔同,係因為你哋做人冇原則、冇底線、冇承擔、冇責任感,同埋冇腦啊。」講講吓,佢話:「你要食嗰啲冰冰冷冷嘅生命麵包,你鍾意食,無所謂嘅……陣間我夠鐘收工,我有第二班警察接我,你哋就食生命麵包,我就上深圳食海底撈,諗起都正啊!又可以飲冰凍啤酒!」

嘉頓曾為抗日軍人趕製軍糧

喺海底撈同生命麵包之間,唔少網民都揀生命麵包,又有人問「其實嘉頓可唔可以告佢(警察)?」不過,入過理大嘅人話見唔到生命麵包,反而見到好多豬扒、腸仔。

生命麵包係本地牌子嘉頓嘅老牌產品,根據嘉頓網,1937年抗日戰爭時,嘉頓試過連續7日24小時不停趕工,為軍人製作20萬磅勞軍餅乾。呢段歷史真係鮮為人知,但細細個食生命麵包做早餐就係唔少人嘅回憶,仲有網民噚日專登買生命麵包做早餐,話要回味一吓粗粒花生醬搽麵包。

至於抗警暴嘅同路人,就緊係「和你食」,港人日程表嘅「和你lunch」已變「和你食包」,話要畀警察知道食麵包唔可恥。

上 / 下一篇新聞