港聞

港聞二

下一篇
上一篇

【Emily】叫阿媽勿落區 葉劉阿女怕做孤兒

【明報專訊】立法會噚日繼續辯論休會待續議案,討論點樣確保周日區選安全順利舉行。建制派發言時繼續力數近日暴力事件,話候選人及拉票者都有人身安全風險,其中行政會議成員、新民黨主席葉劉淑儀發言時更提到,佢個女都叫佢唔好落區助選,「因為佢唔想做孤兒」,佢都同阿女講唔會咁誇張,阿媽亦會好小心。葉太愛女Cynthia今年30歲,一直都好關心媽咪。

葉太形容,修例風波令新民黨損失兩個區議員,一個退黨,另一個更結束咗政治生涯,並透露對方同佢講唔會再參選時,係去一個公園同佢喊住咁講。葉太話,現時落區為黨友拉票「每一個點都唔會逗留得耐」,因為好快就會有人包圍佢,曾有高大青年指罵佢,𠵱家會盡量隔籬左右都睇真啲,背脊盡量貼牆。

民建聯葛珮帆發言時就話,該黨有候選人曾被10個著校服嘅中學生圍住打,但佢無透露詳情,又話民建聯辦事處被破壞,破壞者「特登剪斷啲電話線、上網線」,好多人見到唔識嘅來電都唔接聽,辦事處被破壞令佢哋打唔到畀選民通知投票。

相關字詞﹕葛珮帆 民建聯 新民黨 葉劉淑儀

上 / 下一篇新聞