港聞

港聞二

下一篇
上一篇

【Emily】CY論駐軍清路障:西人返工途中清障係咪違法?

【明報專訊】全國政協副主席、前特首梁振英(CY)係理工大學前身理工學院嘅校友,近兩日佢母校有事,警察同示威者、學生激烈衝突,CY噚日一日內就喺facebook出咗至少5篇帖文評論時政,包括理大嘅衝突情况。其中一則回應公民黨郭榮鏗批評,解放軍上周六(16日)自發喺九龍塘軍營附近清理路障係違反《基本法》,CY就反問有「西方人」著住西裝、拎住公事包,喺返工路上幫手清除路障,如果佢哋工作簽證嘅批注不是「在馬路上清除路障」,呢啲人係咪觸犯咗入境處嘅居留條件?

CY又揶揄郭榮鏗:「大律師都是聰明人,不聰明不可以當大律師,但大律師戴了民主的面具,一葉障目,就糊塗起來了,為什麼?」

佢有3篇帖文都提到理大情况,朝早一篇就質疑理大學生會會長廖健鈞就理大事件喺電台「侃侃而談」,會否成為日後取證時嘅證據,建議學生會搵冇政黨背景嘅律師畀法律意見,「萬事小心」。下晝一篇就提到,無綫新聞話佢哋採訪隊喺佐敦道採訪期間被黑衣人威嚇,要求交出攝影機記憶卡,又引述示威者要求採訪隊「交機,一是命一是交機」。佢話「終於明白毛孟靜為什麼說死物不重要,因為不毁壞死物,就要你的命」,呼籲大家每次投票時都要記住呢句話。

相關字詞﹕理工大學 民主派 郭榮鏗 梁振英

上 / 下一篇新聞