港聞

港聞二

上一篇

【Emily】工聯為候選人提供防刀割背心

【明報專訊】立法會議員何君堯競逐連任屯門樂翠選區區議員,日前擺街站時畀人持刀襲擊。唔少候選人都陸續採取策略「加強保安」,工聯會立法會議員陸頌雄話,工聯會有為候選人提供可以防刀割嘅防衛背心。新民黨候選人陳家珮就話會揀有牆嘅地方擺街站,慎防有人從後突襲。

何君堯對手團隊亦曾遇襲

除咗建制派候選人擺街站時受滋擾,泛民候選人都會被圍。何君堯嘅對手、民主黨候選人盧俊宇接受商台《在晴朗的一天出發》訪問時話,競選團隊一個月前曾經遇襲,面對突發情况只可以「執生」,𠵱家會有一定人數先擺街站,仲會行孖咇、搵埋拍檔一齊宣傳,兼隨身帶遮。

何君堯仍然留醫,噚晚多名建制派議員去探病,民建聯葛珮帆(EQ)形容何精神唔錯,又話何可以吉人天相,一來因為佢身手敏捷閃避及時;二來係一早有預防,安排咗兩個助手喺身邊保護。

屯門樂翠區選區另一候選人係蔣靖雯;元朗天恆選區其他候選人包括王百羽、陳志成同陳嘉進。

上 / 下一篇新聞