港聞

港聞二

下一篇
上一篇

【Emily】「香港解密」又起底 單仲偕變勇武+極端+暴徒

【明報專訊】反修例風暴以來,網上起底成風,網站「香港解密」噚日上載大批非建制派區選候選人資料,並話多人係「暴徒」。當中,民主黨元老單仲偕竟然被指係「勇武派極端暴徒」,話佢參與暴力抗爭活動、教唆「暴徒」製作武器等。單仲偕就同Emily講「當之有愧」,佢只係曾經參與民陣遊行,又唔識製作武器,「我一把年紀,都登六啦,冇能力去做勇武啦」。

單:當之有愧 只曾遊行

「香港解密」又上載咗單仲偕嘅手機號碼,不過單仲偕就睇得好開,話號碼印咗喺選舉單張,多人知都唔出奇,已經當係公開資料。佢又話「起底」應該係公開一啲秘密資料,但個網站只係無中生有,所以不能叫「起底」,而係「誹謗」喎。

上載大批泛民候選人資料

大批非建制候選人嘅資料被上載「香港解密」,但好多人畀網站報細年齡。參選油尖旺九龍站嘅民主黨李穎妍就被指喺1994年出世,𧨾得佢相當開心,「仲細過我個妹,我都知我個樣年輕,但不要這樣讚我吧」。

單仲偕今次參選葵青華麗,同區候選人包括黃耀聰、譚荏之、戴沛珊、阮國基;李穎妍同區對手包括孔昭華、容熙智。

上 / 下一篇新聞