港聞

港聞二

下一篇
上一篇

【Emily】中藍水 被囑說話小心點 毛漢:風涼說話 鄭泳舜:關心好友

【明報專訊】警方水炮車前日向位於尖沙嘴嘅九龍清真寺噴射藍色水劑,其中印度協會前主席毛漢(Mohan Chugani)被射中,唔少本身同佢友好嘅建制派都非常關注,好似民建聯鄭泳舜(Vincent)即日已去探望對方;新民黨主席葉劉淑儀當日亦馬上聯絡佢並慰問。毛漢噚日喺港台節目話,有民建聯議員前晚到訪,着佢「與記者說話要小心點,否則會被人利用」,毛漢話呢啲係風涼說話,「事實係咁就係咁」。

鄭:無其他用意

Vincent同Emily講,佢同毛漢認識咗十幾年,作為好朋友,所以去關心同了解對方情况,如果對方有咩諗法,亦會幫忙跟進;當時佢同毛漢提及,傳媒或會將事件同宗教、種族連埋一齊講,要注意一下,強調唔係如個別傳媒所指要「警告」對方。Vincent喺書面回覆度話,毛漢同佢反映對事件嘅意見,佢即晚將意見轉達保安局及警方,噚日朝早亦聯絡政務司長辦公室,要求當局即時正視清真寺事件,盡快落區向少數族裔宗教團體解釋。

Vincent話,毛漢係佢好尊敬嘅前輩,一直以來為少數族裔爭取唔同支援政策及福利,佢同黨友係抱住關懷嘅心情探望及關注對方傷勢,又希望各方同少數族裔一齊化解現時社會嘅分裂,讓香港重回正軌,並無其他用意。Vincent有報名參加區選,同區參選人包括公民黨劉家衡、王曉聖。

相關字詞﹕鄭泳舜 水炮車 清真寺

上 / 下一篇新聞