港聞

港聞二

下一篇
上一篇

【Emily】馮檢基參選又撞區 自比蜜糖 戰尖沙嘴西 陳嘉朗今報名

【明報文章】區議會選舉正值提名期,立法會前議員馮檢基噚日報名參選尖沙嘴西,同獨立民主派陳嘉朗(Leslie)撞區。基哥噚日就話,係有人搵佢幫手填「白區」先至出戰,強調願意商討、可以做民調。馮檢基上年參選立法會九龍西補選,當時泛民已力薦工黨李卓人參選,故馮被指𠝹票,被問到經常遇上呢類事情,會唔會自覺不幸,基哥語出驚人:「可能馮檢基係蜜糖啦,好多嘢『嬲』埋嚟。」

馮:泛民搵我填白區

基哥話佢6月之前都冇諗過參選,其後因為民主黨蕭亮聲希望搵人填白區,九龍城區議員楊振宇為此聯絡佢,希望民主派有資深嘅前議員挑戰建制派,佢做完資料搜集就決意出戰。被問到撞區問題,佢話有中間人曾安排佢同Leslie傾,但對方只願出戰當區,結果未能商討;基哥話可以做民調,如對方勝出佢可以唔選。

基哥去年初就3.11九西補選參加民主派初選時,曾表示係「最後一次參選」,佢噚日就重申係民協內部初選嘅承諾,但認為每個人決定係咪參選都係政治權利;至於出年會唔會再度參選立法會?基哥就話太遙遠,唔處理住喎。Emily搵過Leslie回應,撞啱佢忙於擺街站,佢話今日報名時會再交代。尖沙嘴西另一已報名參選人係報稱獨立嘅梁幸輝。

相關字詞﹕提名期 撞區 尖沙咀 初選 選舉 馮檢基 區議會選舉

上 / 下一篇新聞