港聞

港聞二

下一篇
上一篇

【Emily】任醫局CEO個半月 高拔陞:感覺好耐 稱新主席范鴻齡「好有心」 盼互相補足

【明報專訊】8月1日履新嘅醫院管理局行政總裁高拔陞噚日同傳媒茶敘,佢話上任個幾月以來壓力唔細,覺得時間過咗好耐。佢話自己淨係做過醫管局份工,熟悉臨牀工作,但決策層次嘅管理工作就唔係好熟,相信可以同管理經驗豐富嘅新任醫管局主席范鴻齡互相補足。

有「公職王」之稱嘅中信泰富前董事總經理范鴻齡舊年12月加入醫管局大會,高拔陞話喺嗰時認識佢,形容范雖然對醫療範疇唔太熟悉,但對醫管局「好有心」,傾落都好隨和,感覺肯聽人意見同開明。

不贊成醫院集會 盡可能溝通

喺反修例示威浪潮下,公立醫院不時有集會,醫管局曾接投訴。高拔陞話官方立場係唔贊成醫院搞集會,始終影響「唔係零」,但明白同事有情緒,會盡可能溝通。佢認為要謹守唔影響病人服務嘅原則,對於連儂牆出現針對個人、起底同粗言穢語嘅內容,佢就覺得唔可以接受。

近月有醫護反映警方阻礙醫院運作,早前畀警察打穿頭嘅17歲男生一度被鎖手銬,要用尾指骨折嘅右手進食,警方行為多番被質疑凌駕醫護專業。被問有無同警方高層反映,高拔陞話雙方喺近月事件中都「學到嘢」,慢慢改善緊溝通,佢向醫護保證,會支持佢哋喺醫療上「做需要做嘅嘢」。

提前準備冬季流感 撥7億買儀器

另外,對於即將來臨嘅冬季流感季節,高拔陞話局方已提前做準備,包括預先向聯網撥款7億,部分用嚟增購呼吸機、血氧含量機等,避免病房之間借來借去,「唔夠一定畀到你夠」。另外,資訊科技部籌備緊新系統,簡化登記及申請「特別酬金計劃(SHS)」嘅程序等,佢期望喺今個流感季節推出。

相關字詞﹕范鴻齡 高拔陞 醫管局

上 / 下一篇新聞