港聞

港聞二

下一篇
上一篇

【Emily】逾半挺政府者:林卓廷致7‧21 阿廷:立場問題 搵民主派代罪

【明報專訊】反修例風波以來,網上流言、假消息滿天飛,有時都真偽難分。中大傳播與民意調查中心近期做民調,亦有就呢個議題問受訪者意見,調查舉出近日幾宗事件,訪問市民認為係「真確」定「虛假」,結果顯示,逾五成「政府支持者」眼中,仍然認為7月21日元朗襲擊事件,係民主黨立法會議員林卓廷帶示威者入元朗所致。

林卓廷就向Emily重申,當晚佢有全程facebook直播,事件係黑幫無差別襲擊市民,事實清楚不過;但其後有建制傳媒放假料、亂剪接屈佢。阿廷相信咁多建制支持者認為係事實,其實係立場問題,因為佢哋唔想承認警方刻意容許黑社會無差別襲擊市民,唯有搵民主派陣營嘅代罪羔羊,而佢當日在場,所以就指摘佢。

運動參與者 六成稱屬假

中大新聞與傳播學院院長李立峯公開調查結果,調查於本月5至11日訪問623人,整體而言,44.4%受訪者認為「元朗事件由林卓廷所致」呢件事係假嘅,17.4%認為係真,都有30.8%認為未經證實。自認政府支持者當中更有逾五成人認為係真;至於參加過最少一次遊行或行動嘅「運動參與者」,就有六成人認為係假。

至於「8月11日示威中有女示威者眼睛嚴重受傷、傷勢係警方嘅布袋彈所致」呢句陳述,有51.5%受訪者認為係真,10.9%認為係假,35.8%認為未經證實。

上 / 下一篇新聞