港聞

港聞二

上一篇

【Emily】新組織保民聯參選 「建制中嘅建設派」

【明報專訊】區議會選舉11月24日舉行,有新團體成立宣布計劃派4人出選,呢個團體叫「保障民生建設聯盟(保民聯)」,標榜不講政治、只講民生,佢哋鬧完民主派又批評目前建制派表現差,並自稱係建制派中嘅「建設派」。講到反修例示威,保民聯召集人袁桂禧話,政府修訂《逃犯修例》初心係好;至於點睇民間五大訴求,袁桂禧就話政府要「聆聽」,其他成員亦話贊成先由監警會調查。

保民聯噚日開記者會介紹政綱,袁桂禧係中醫,團體註冊地址同佢診所地址相同。談到反修例,袁桂禧話6月時有百萬人上街,但特首受到行政會議成員等影響,無聽到外間聲音,話現時行會及立法會好多人「過氣」,又話𠵱家社會二元對立,對暴力事件感到痛心。咁佢哋近期有無參加遊行集會呢?發言人林斯嵐就話無,指好多遊行係非法,形容佢哋係守法公民;又話特首顧全大局撤回修例。佢又話,𠵱家大家爭拗用獨立調查定係監警會調查,認為先等監警會做完工作,唔應該架空監警會。

保民聯考慮循4區出選,包括大圍、北角和富、美孚南及愛秩序灣,4區現任議員都係建制派。佢哋話目前大部分選區都係建制派做,選區主要揀佢哋熟悉嘅地方。

上 / 下一篇新聞