港聞

港聞二

下一篇
上一篇

【Emily】胡志偉陳曼琪 告別黃大仙區會

【明報專訊】黃大仙區近月爆發多次警民衝突,黃大仙區議會噚日開會,討論反修例示威引起嘅衝突問題,警方無派代表出席。會上多名民主派區議員為反修例運動中已犧牲性命或「被自殺」嘅人默哀1分鐘,其間建制派議員離場。

11月區選,盛傳唔會出選嘅民主黨胡志偉會上感慨,佢最後一次以黃大仙區議員身分發言,話絕大多數參與示威嘅市民都係和平理性,政府卻漠視市民訴求,一邊話設立對話平台,但又唔提供對話基礎,只會令警民衝突一直升溫。佢話有民調顯示八成人支持成立獨立調查委員會,但政府不接納同反省,「最大對立係特區政府本身」。

胡志偉提出臨時動議,促請政府成立獨立調查委員會,作為社會回歸理性嘅基礎,但遭區議會主席李德康運用主席權力否決。

同樣自稱最後一次以黃大仙區議員身分發言、港區人代陳曼琪就話,對話基礎要源於反對一切暴力,以及要同暴徒、爭奪香港政府管治權、港獨嘅人割席,又話只要「有規有矩、安全」,就有民主及自由。佢話警方最大職責係執法,獨立調查委員會有政治性質,無助解決撕裂,應交由現行法治基礎處理。

相關字詞﹕陳曼琪 胡志偉 黃大仙區議會

上 / 下一篇新聞