港聞

港聞二

下一篇
上一篇

【Emily】海綿棒練習 練武!大學生學自衛

【明報專訊】噚日下晝陽光充沛,喺中大百萬大道,有一班同學手持海綿棒,學習點樣抵擋攻擊。中大學生會趁大專罷課期間發起「全民練武班」,會長蘇浚鋒話,希望同學強身健體,學一技傍身保護自己。佢又話,上星期已舉行過一場練武班,反應好好,噚日第二場,有60至70名同學參與,由校友做導師,參加者用游泳海綿棒做練習工具,學習當有人攻擊,被皮帶鎖手時,點樣格擋攻擊者。佢話同學唔係學攻擊人,而係學保護自己。

教大生:將來當老師須護學生

而喺另一校園香港教育大學內,學生會臨時行政委員會亦舉行兩節自衛術訓練班,有40至50人參與,同學亦係用海綿棒練習,學用手或海綿棒棍抵禦人哋攻擊。屬會事務幹事郭梓峰話,早前嘅和平示威遊行,有人持武器追打示威者,7.21元朗襲擊事件,有黑社會入港鐵站內無差別攻擊路過市民;同學上完自衛術班,萬一遇上呢啲情况,都學識保護自己同身邊嘅人。佢又話,大部分教大同學將來都會成為老師,更加要學習點樣喺危急情况下保護學生。

另外,中大學生會話今晚同中大天文合作,舉辦「烽火臺野餐:中大觀星團」活動,重點係教大家點樣用雷射筆觀星,話機會難得,叫大家一定要捧場。

上 / 下一篇新聞