港聞

港聞二

下一篇
上一篇

【Emily】晤美領事 葉劉促勿通過人權法案

【明報專訊】周日有市民遊行到美國駐港總領事館請願,促請美國國會通過《香港人權與民主法案》,新民黨主席葉劉淑儀同副主席容海恩噚日就拜訪新任美國駐港總領事史墨客(Hanscom Smith),請佢向美國國會領袖轉交新民黨意見書,反對美國國會通過法案。新民黨喺意見書再提到該黨支持修訂《逃犯條例》,繼續話1998年民主黨李柱銘曾喺動議議案,敦促港府同北京當局商討有關移交逃犯安排。

指修例撤回 美國會冇通過理由

葉太又話,香港民主及人權狀况一直良好,特首喺月初宣布正式撤回修例,美國國會冇通過法案嘅理由;若法案通過,將損害港美長期以來互惠互利嘅合作關係。其實,李柱銘之前已經澄清咗,當年因為發生「張子強案」,張子強逃到內地,民主黨想引渡佢回港受審,係建議基於「港人港審」處理移交逃犯。

另外,公民黨黨魁楊岳橋同黨友譚文豪噚日喺台灣,同陸委會主管香港事務的官員會面。楊岳橋喺facebook話,向對方清楚指出即使政府宣布撤回修例,港人仍堅持「五大訴求,缺一不可」嘅信念,反映咗香港警方濫權濫捕事實,亦有就港人赴台事務包括簽證、工作等事交流。

相關字詞﹕美國駐港總領事館 容海恩 香港人權與民主法案 葉劉淑儀 反修例風暴

上 / 下一篇新聞