港聞

港聞二

下一篇
上一篇

【Emily】母校外人鏈 民記成員想溝通被勸走

【明報專訊】噚日多間中學嘅學生、校友發起組人鏈重申「五大訴求」,民建聯社區主任劉鎮海喺facebook話,返咗北區母校香港道教聯合會鄧顯紀念中學,想用舊生名義「表達對母校及香港嘅支持」,又話走咗一圈想同參與者溝通,但校長以以免造成混亂為由,勸佢離開。

劉鎮海現於彩園區服務,現任區議員係身兼北區區議會主席嘅民建聯蘇西智。劉話噚日喺母校被在場人士叫罵「民建聯 最無恥」,但佢仍然相信以手拖手表達訴求嘅「和理非」,係解決社會撕裂嘅重要橋樑,又話相信校友對香港有感情、希望香港更好;雖然噚日溝通失敗,大家未有機會交流,但歡迎鄧顯與一同參與人鏈嘅東華三院甲寅年總理中學舊生再約時間溝通。

唔少人留言,有人仲話多謝呢位師兄,「一齊嗌,光復香港、時代革命」;劉鎮海即回應冇咁嗌,「表明反對港獨,但普選行政長官絕不可缺」。有網民唔領情,話佢係「鄧顯之恥」,又話難明佢點解會加入「禮義廉」自甘墮落,做政府「走狗」。

相關字詞﹕對話 反修例風暴 民建聯 人鏈

上 / 下一篇新聞