港聞

港聞二

下一篇
上一篇

【Emily】遊行去美領館 兩隊人馬宣言雙胞

【明報專訊】前日舉行嘅美國駐港總領事館遊行迫爆花園道,促請美國國會通過《香港人權與民主法案》,當日有唔少人高舉美國國旗同唱美國國歌,大部分參加者都跟住主辦單位嘅時間,約兩點鐘由遮打花園起步行上去美國駐港總領事館。但原來此前,同樣高舉美國國旗同支持通過《法案》嘅另一網上組織「香港自治行動」已經於1點半到達領事館外,其後兩隊人馬相遇,遞交請願信時發生咗一段小插曲。

先後宣讀請願信 互斥「騎劫」

美國駐港總領事館派代表出嚟,原本係接活動主辦單位嘅請願信,喺主辦單位宣讀請願信英文版內容之後,「香港自治行動」隨即宣讀佢哋自己嘅請願信,先再由主辦單位代表讀多一次請願信中文版。最後,雙方都有將佢哋嘅請願信交咗畀領事館代表。

遊行完結後,晚上有自稱主辦單位「旗手」成員不滿,認為活動被人「騎劫」,更一度懷疑主辦單位封請願信無交到畀領事館代表,喺連登開post引起小火花。

有「香港自治行動」嘅支持者反認為,喺近日反修例運動中帶頭高舉美國國旗嘅其實係佢哋,反而前日嘅遊行先係「搶」咗佢哋嘅做法。

相關字詞﹕香港自治行動 美國駐港總領事館

上 / 下一篇新聞