港聞

港聞二

下一篇
上一篇

【Emily】民陣前召集人扮阿sir 教被捕者權利

【明報專訊】反修例運動令全民見識到警權,被捕者逾千,唔少被捕者現身說法指控警方濫權,令唔少人關心被捕權利。facebook專頁「法夢」噚日上載短片,由有多次被捕經驗嘅民陣前召集人楊政賢扮演警察,示範多個濫權情景。

拍片示範濫權情景

其中一個情景,係有人被制服喺地後大叫好痛,要求飾演警察嘅楊政賢展示委任證,楊政賢堅稱情况唔許可,「再唔合作我會加控你阻差辦公」。另一個情景中,楊政賢係咁游說被捕者喺律師未到之前錄口供;被捕者要求見律師,又重複話「我無嘢講」,楊政賢就話佢十問九唔應,只對自己不利。

楊政賢:多被捕經歷 熟警察口脗

點解由佢扮警察?楊政賢同Emily講「因為無人扮囉」,又講笑話自己多被捕經歷,好熟悉警察說話口脗,片段部分情景係佢親身經歷,例如被指阻差辦公、錄口供經過。短片係喺7.28楊政賢被捕後製作嘅,佢話好多人都知道被捕後喺律師未嚟前要講「我無嘢講」,但現實係警員會好似片段裏面咁用盡唔同方式,令被捕者無法咁樣回應。佢希望呢啲情景會提醒市民被捕權利。

「法夢」又話,希望通過短片畀大家知道,就算遇上任何情况,都要保持冷靜,盡量保護自己;如果想知更多被捕者權利,可以參考法政匯思嘅懶人包資料(https://bit.ly/2MKdbpy)。

相關字詞﹕警方濫權 被捕權利 楊政賢

上 / 下一篇新聞