港聞

港聞二

上一篇

【Emily】「綠在東區」變街坊聚腳點

【明報專訊】政府2013年起推行「綠在區區」計劃,逐步喺多區興建環保回收站,目前全港有7個「綠在區區」回收站投入服務,除咗收集可回收物料循環再造,營運機構亦可以喺回收站辦展覽、講座等,推動環保教育。

公園式設計 有庭園花園

其中位於筲箕灣愛信道嘅「綠在東區」回收站,用地原本係臨時停車場,有份參與建造回收站嘅建築署高級建築師李百怡話,設計時唔止希望興建回收站,仲希望改善社區,因此項目採用「公園」設計,包括運用一排排竹,用嚟做屏風同支架,並設有多個庭園同花園,配以竹林、鵝卵石道、綠油油草地等,令居民途經回收站時都可以欣賞園林景色。

李百怡又話,「綠在東區」係將舊貨櫃作為模組改裝做物料回收站,並特意將部分貨櫃嘅「外皮」(即係貨櫃側面嘅鋼板)拆去,換上落地玻璃引入自然光。另一建築署建築師梁建航就話,呢種模組式建築設計可以縮短施工時間。

發展局長黃偉綸話,「綠在東區」已經變成街坊聚腳點,形容係市民可以使用、又兼具活力嘅公共空間。

上 / 下一篇新聞