港聞

港聞二

下一篇
上一篇

【Emily】區選素人撞區 先落區護士讓位

【明報專訊】反修例風波令唔少素人考慮出戰區選,但太踴躍變成撞區。話說中西區「大學」選區,註冊護士任嘉兒同「反自動當選運動」(反自動)歐頌賢都考慮參戰,雙方會面協調後,任嘉兒話未能達成共識,宣布停止相關工程。

任嘉兒:兩個人都堅持,勝率是零

任嘉兒喺fb話「如果兩個人都堅持繼續留低,贏的機會是零」,寄語歐頌賢一定要贏。歐頌賢就話曾討論初選、提名者多寡決定,但一致同意過於費時,尊重任嘉兒決定。歐頌賢同Emily講,任嘉兒剛辭工,仲喺通知期內,自己較多時間落區,任嘉兒願意讓畀佢;至於會唔會再協調,佢話希望網民、居民尊重佢哋決定。

民主黨許智峯曾參加協調會議,形容任嘉兒顧全大局、提出退讓,促成一名民主派出戰。民主動力召集人趙家賢就透露,歐頌賢落區前,任嘉兒已經喺民動協調名單內。

「反自動」話歐頌賢拒退違平台原意

「反自動」就話,歐頌賢考慮參選後,發現任嘉兒已出戰大學區,「反自動」認為任嘉兒較適合,仲話曾經勸喻歐退選,但被拒絕。「反自動」認為歐處理失當,有違平台原意同支持「年輕人優先」想法,無法繼續支持歐出選,希望任嘉兒重新考慮參選。

上 / 下一篇新聞