港聞

港聞二

下一篇
上一篇

【Emily】德國熊貓孖胎命名 「Hong」「Kong」最多人建議

【明報專訊】中國不時都會向外國租出或者贈送大熊貓,被稱為「熊貓外交」。德國柏林動物園內由中國借出嘅大熊貓「夢夢」,當地時間今個月1號誕下一對雙胞胎。德國《每日鏡報》最近邀請讀者為大熊貓BB改名,收到最多人建議嘅名係「Hong」同「Kong」,仲有讀者寫信畀報館,話中國經常將送畀其他地方嘅大熊貓改一啲有政治意思嘅名,希望德國可以同「為生存而戰嘅城市」團結一致,將大熊貓BB命名「Honghong」同「Kongkong」。

有人建議改名「黃之鋒」「周庭」

仲有讀者建議熊貓BB可以叫「Joshua Wong Chi-fung」同「Anges Chow Ting」,即係喺8.31前夕畀警方拘捕嘅香港眾志黃之鋒同周庭。

「夢夢」同伴侶「嬌慶」係中國2017年借畀德國,為期15年,英國《衛報》報道,德國每年要交租100萬歐元(約860萬港元),而大熊貓BB亦屬於中國,大概3至4年後、可離開父母獨立生活時,就要交番畀中國。

盈盈確定今年無懷孕

喺香港,海洋公園噚日公布大熊貓盈盈妊娠徵狀已減退,確定今年無懷孕。公園話會繼續努力做繁殖工作,希望未來可迎接大熊貓寶寶誕生。

上 / 下一篇新聞